Ngoloneya wErongo a pula eengeshefa di xulife po okulandifa omakaya

Ngoloneya wErongo Nathalia |Goagoses okwa indila eengeshefa odo da tala ashike mokulandifa omakaya di konge omikalo dimwe dokuninga oiyemo ponhele yokukala ashike da tala mokulandifa omakaya.

Oshinima eshi okwe shi pula pefimbo leenghundafana dopashiwana Omaandaxa di na sha neindilo lokuninga omalunduluko mokatendo ke na sha newiliko lomakaya.

Ngoloneya okwa ti eeveta da pama oda pumbiwa di amene ounona novanyasha vaha longife oikwamakaya, oyo ta ti otai ningi mo ihapu moshiwana.

Okwa ti oupyakadi kau shii ashike oshinakuwanifa shovadali, ashike novakulunhu yo neengeshefa edi hadi landifa oinima ei.

“Paife ounona vetu ova tanwa kovakulunhu, keengeshefa,” |Goagoses ta ti, ta pula kutotwe eeveta di ungaunge neengeshefa edi tadi eta oupyakadi ou.

Okwa pula yo ovakwatelipo voveta va pewe eenghono dokutamaneka ovo tava hepeke ovanyasha noinima ei voo va dule okupewa omahandukilo a nyaya komunhu.

“Natu nghonopeke eeveta detu ndee hatu landula ovakulunhu ava, eengeshefa edi tadi teyaula po ovanyasha vetu,” osho a ti ngaho.

Ngoloneya okwa ti elongifo lomakaya inali li kalekelwa, ta popi kombinga yomaludi a yooloka okunana omakaya.

Omapopyo aye ee ya eshi Namibia ta talulula oveta yokuwilika omakaya konima yomido di dule pomulongo eshi kwa li ya tulwa moilonga. |Goagoses okwa ti oveta oyo aike inai wana.

Okwa pula elongelokumwe pokati kepangelo, nomalelo oitopolwahoololo needoolopa, ovaleli vopamufyuululwakalo, eengeshefa, eefikola, eefamili noshiwana shi amene ovanyasha vaha pikwe komakaya.

“Natu longeleni kumwe ndele hatu ningi po sha sha yooloka paife.”

Omunashipundi wokomitiye Joseph Shapumba okwa ti oveta okwa li ya lundululwa xuuninwa momudo 2010 ndee eyopombada loikwamakaya ola eta omumbwe opo i talululwe vali.

“Otwa mona omumbwe yokuuya moshiwana tu kundafane ndee hatu udu omadilaadilo nghee tu na okuxwepopeka okatendo komakaya ka dule okukwatela mo omumbwe yoshiwana,” Shapumba ta ti.

Oveta yokuwilika elongifo lomakaya paife oya gambeka okulandifa omakaya komunhu e li koshi yomido o18.

Novalandifi ova teelelwa va kale va yeleka kutya omakaya ihaa landifwa kovanhu ve li koshi yomido edi.

Omunhu ou ha landifa omakaya komunhu e li koshi yomido o18 ota dulu okupewa ehandukilo loshimaliwa sha ya fiyo opoN$100 000, odolongo yomido nhano ile omahandukilo aeshe oshita.

Ashike nee, elongifo lomakaya ola ya pombada neenghono okudja ngaa nghee oveta ya pitifilwe.

The post Ngoloneya wErongo a pula eengeshefa di xulife po okulandifa omakaya appeared first on The Namibian.