Sacuudiga oo sheegay in la soo riday diyaarad lagu beegsa rabay Makka.

Boqortooyada Sacuudi Carabiya ayaa faahfaahin ka bixisay howlgal lagu soo riday diyaarad nooca aan duuliyaha lahayn oo dul maraysay magaalada barakeysan ee Maka Al-Mukarama.

Afhayeen u hadlay Ciidanka Difaaca Cirka Sacuudiga ayaa sheegay in Maka Al-Mukarama iyo Madiina Al-Munawara ay yihiin “khad cas” oo si heer sare ah loo ilaaliyo, isagoo xusay muhiimadda gaarka ah ee labada magaalo ay u leeyihiin Muslimiinta dunida.

Sacuudiga ayaa sheegay in aan la aqbali karin isku day kasta oo lagu beegsanayo labada magaalo ee barakeysan, isagoo ugu baaqay guud ahaan Muslimiinta inay si wadajir ah uga hortagaan cid kasta oo damacda inay waxyeello u geysato Maka iyo Madiina.

Xiisadda u dhexeysa Sacuudi Carabiya iyo Xuutiyiinta Yemen ayaa toddobaadyadii lasoo dhaafay sii xoogeysanaysay. Riyadh ayaa sheegtay in Xuutiyiintu beegsadeen xarumo shidaal, garoomo diyaaradeed iyo saldhigyo ciidan, halka Sacuudigu uu qaaday weerarro uu ku sheegay jawaab celin.

Dhanka kale, afhayeen u hadlay Xuutiyiinta Yemen ayaa beeniyay in kooxdu beegsatay magaalada Maka Al-Mukarama, isagoo eedeymaha Sacuudiga ku tilmaamay kuwo aan sal iyo raad lahayn.