OUTAPI – Koshivilo shOlufuko okwa li kwa ungenekwa omaudano womafiyafano wokutondoka weenghambe wa ningwa mefiku lomapendafule nelalakano lokuyandja efimaneko kovakondjelimanguluko.
Ovanhu vahetatu ova kufa ombinga mokulonda eenghambe omo kwa li tadi lotoka oinano ya yooloka.
Oshivilo shOlufuko osha tameka omafiku 24 notashi xulu 01 Sepetemba 2026.
Oukadona 121 neudo otava kufa ombinga kOlufuko okukala va longwa eenghulungheedi doshiwambo osho yo okupewa ehongo nghene ve na okuliumbata.
Omupresidente Netumbo Nandi-Ndaitwah oye ta kala a patulula Olufuko pambelewa nena nokuli omupopi wefiku a fimana.
Omuunganeki no ku li omukwateli komesho moudano weenghambe tadi lotoka Johannes Shaanika okwa ti oudano owa enda nawa noshiwana okwa li sha holoka momwaalu muhapu okutala eenghambe eshi tadi ningi omafiyafano okulotoka.
Okwa hokolola ta ti elalakano okutumbaleka ovakondjelimanguluko shaashi vamwe okwa li hava longifa eenghambe pefimbo loita, naashi osha eta opo oudano ou u kale wa ningwa mefiku lomapendafule.
Okwa weda po ta ti natango elalakano loudano okukaleka po efimano lomifyuululwakalo shaashi ovanhu nale okwa li ashike hava longifa eenghambe onga oyendifo yavo.
Shaanika okwa ti oshi li oshikando shotete kOlufuko ta kuningwa oudano weenghambe tadi lotoka.
“Natango momudo tau ya ohatu kala tuna efiku loudano woludi eli, omo twateelela ovanhu vahapu va kale va kufa ombinga,” ta ti.
Okwa ti ovanhu va findana ova pewa omakopi osho yo eembadi.
Murumbua Uetjesavi umwe a findana eya ponomola yotete okukala a fiya po vakwao eshi onghambe yaye ya fika tete momafiyafano oshinano sheemita 1800.
Shaanika okwa hokolola ta ti eenghambe okwa li tadi lotoka oinano ngaashi eemita 1800, eemita 1600 osho yo eemita 1200.
*fhamalwa@nepc.com.na *
The post Olukufo la unganeka oudano wokutondoka weenghambe appeared first on New Era.
