Molwa oshikukuta osho sha taalelwa koitukulwa ihapu konooli omo nokuli omatale a hapu a pwiinina nale, ehangano lo NamWater ola kwashilipaleka kutya ota li ka handja omeva keenhele odo ta di dengwa kenota moule weemwedi twa finda. Edi oda popiwa komupopiliko woNamWater Lot Ndamanomhata.

Ndamanomhata okwa holola kutya ova didilika kutya omuloka woneudo otau shongola keembinga dimwe doshilongo.

Okwa ti eshi ota shi fininike opo ehangano li ye mo onyala moshinima omu nokukwashilipaleka kutya ova kwafa oshiwana kenota.

“Mopaife oha tu dulu oku wanifa po eemhumbwe domeva koitukulwa ngaashi Ohangwena, Oshana, Oshikoto, Omusati osho yo Kunene mekwatafano neetenga odo da kula hatu pombele omeva taa andjakanifwa komikunda da yooloka meni loitukulwa oyo,” ta ti.

Ndamanomhata okwa twikila kutya nonande tava kendabala okukala va andjakanifa omeva koitukulwa oyo adja nokutumbula oule wefimbo olo tava dulu, omhumbwe yomeva moshilongo oina ashike oku kala tai twikile fiyo outalala tau xulu.

“Eshi oha ndi shi popi shaashi omeva ahapu aa hatu pungula ohaadi kodula notwa teelela omuloka tau shikula opo tu kale twa ongela omeva tu topolele oshilongo ashishe,” ta yelifa.

Ndamanomhata natango okwa yelifa kutya ngaashi koitukulwa imwe, ovanhu vamwe oha ve li hange vena omeva a pata ile taa ende kashona.

“Eshi oha shi etifwa keepaipi edi dili keenhele da londa odo hadi longifa omeva. Eshi omeva taa ka enda vali a finda peenhele edi da ninga omafilu ile dili momalambo, keepaipi oko ohaa fikiko taa ende kashona omo nokuli to hange ovanhu vahapu ta vati kave na omeva ile omeva avo okwa pata shaashi fimbo limwe ihaa fiki,” ta ti.

Okwa ti mopaife ota va ka longa noufike pamwe osho yo okulipa omalufo opo ovanhu aveshe va kale hava mono omeva shi fike pamwe. “ Opena yo ovakwashiwana vamwe ava vena omeva avo okudilila kouministeli wounamapya osho yo omeva oshiwana, ndele alushe ovena ashike ominino domeva da topa ile da bolokwa ,” ta ti.

Okwa ti otava ka longela kumwe nouministeli ou mokufya oshisho kutya ovanhu i tava kala vali tava fi enota molwa oupyakadi woludi eli. Ndamanomhata okwa kunghilila oshiwana opo shi twikile noku longifa omeva nawa, sho tashi lopota ominino edi da topa.

-taimihaihambo2000@gmail.com

The post NamWater otaka yandja omeva koitukulwa ya dengwa kenota appeared first on New Era.