Ya kunkililwa ya hulithe po okwiikuthila omahala guulithilo kOmbuga

**Victoria Immanuel **

OSHAKATI –Elenga enene lyUukwambi Herman Ndilimani Iipumbu okwa kumagidha oshigwana opo shi hulithe po okwiikuthila omahala goohambo kOmbuga.

Oshikandjohogololo Uuvudhiya moshitopolwa shaShana oshina omahala guulithilo hoka taku ithanwa kOmbuga, naafalama oyendji konooli oyaka ninga ko oohambo dhawo okuhipitha iimuna ya wo.

“Opena omilandu nooveta dhili po dhoka dhina okulandulwa opo gumwe a mone ehala lyuulithilo, ihe ito tameke ashike to tende ehala lyoye mwene kaapena epitikilo okuza komalelo,” ta popi ngaaka.

Iipumbu okwa ti omumvo gwa zi ko oyali ya dhikula po oopala dha thika 400 dhaamboka yiikuthila omahala yene.

Ta ti okwali a gandja etumwalaka kutya kehe ngoka ena oopala dha kwatwa ko na yaye kelelo lyoshilongo ihe, kapena ngoka eyiko, ihe oya tondokele koLand board.

“Ina tu longeni nuudhigu, ihe natu landuleni omilandu dhili po nokuuvathana shoka shili mondjila noshina okuningwa,” ta kumagidha ngaaka.

Omupeha nashipundi gwelelo lyOndonga Lot Kasamane ngoka ali moshigongi moka okwali a gandja oshiholelwa shokwiikuthila evi kOndonga, sho omulumentu gumwe kwali a kutha omuntu omwenyo noku ehameka gumwe omolwa iikumunga yili ngaaka.

“Evi ihali ikuthilwa, ihe ohali gandjwa pamulandu sha ikwatelela kwaamboka ya tulwa po. Ina tu dhineni omalelo gopmuthigululwakalo,” ta popi ngaaka.

Ta ti ngaashi omililo tadhi pi kOmbuga ngaaka ookadhimamulilo ohaya ka dhingoloka kokule oshoka mpoka yena okweenda opena omakoye ga tulwa po shaali paveta.

Kasamane okwa indile oshigwana shi kale tashi pula omapitikilo tango.

Ngoloneya gwoshitopolwa shaShana Hofni Iipinge okwa indile elelo lyopamuthigululwakalo lyUukwambi opo li kuthe onkatu opo aantu taya ikuthile omahala kOmbuga ya hulithe po ombepo ndyoka.

“Onda mono kOndonga oodhalate tadhi dhikulwa po oshoka inadhiya po pamulandu, ano se kUukwambi oshike ita tu kutha ko oshiholelwa shoka,” ta pula.

Iipinge okwa ti oshigwana nashi landule omilandu dha tulwa po.

–vkaapanda@nepc.com.na

The post Ya kunkililwa ya hulithe po okwiikuthila omahala guulithilo kOmbuga appeared first on New Era.