Iilonga oya yi pombanda, ihe oya shuna wo pevi

Omwaalu gwaantu mboka ya li miilonga miikondo yokunduluka, okulanditha mooholosaila osho wo okulanditha moositola oya li ya yi pombanda pethimbo lyoshiluku oshitiyali shomumvo nguka gwo2026.

Oondjambi odha li wo dha londo, ihe odha shuna pevi miikondo yoholosaila pethimbo lyoomwedhi ndatu dha piti.

Uuyelele mbuka owa li wa gongelwa momushangwahokololo gwoBank of Namibia hagu pitithwa aluhe konima yoomwedhi ndatu. Omushangwahokololo nguka ogwali gwa kwatele mo oomwedhi okuza muApilili sigo Juni.

Omushangwahokololo ogwa li gwa tala kiiningwanima yasimana moshimpungu sheliko neyambulopo lyoshigwana. Ogwali wo gwa tala komalunduluko kombinga yeliko miitopolwa yuuyuni.

Ogwa ti kutya iilonga oya li ya yi pombanda kashona nopelesenda yimwe pethimbo lyoshikako oshitiyali shomvula. Eyo pombanda lyiilonga olya li lya konekiwa moongeshefa dhooholosaila, noositola.

Ihe miikondo yokulanditha oohauto, iizalomwa, osho wo iipundi niitaafula oya li ya yi pevi.

Iilonga pethimbo olyo tuu ndika oya li ya gu pevi moshikondo shokunduluka, yagu noopelesenda heyali. Okwa konekiwa kutya unene elunduluko ndika olya kala kombinga yiindulukwa mbyoka yaahe shi oonzo dholudhi lwiikwatenda, nenge iitenda yopetameko, osho wo iilapi.

Uuyelele mbuka owa li wazi momapulaapulo ga ningwa koBank of Namibia mookambani oonene, ano tashiti itawu gandja uuyelele wa kwatela mo iikondo ayihe.

Methano: Aantu taya kondo iilonga moshilando.