Masar oo lagu eedeeyay xasuuq ka dhacay Suudaan.

Dowladda Masar ayaa lagu eedeeyay inay ka dambeysay duqayn ka dhacday waqooyiga Suudaan, taas oo lagu beegsaday macdan-qodayaal u dhashay dalkaas oo ku sugnaa deegaan caan ku ah qodista iyo soo saarista macdanta.

Ugu yaraan 72 qof ayaa la sheegay inay ku dhinteen duqaynta, halka dad kale ay ku dhaawacmeen. Dadka dhaawacmay ayaa la sheegay in loo qaaday xarumaha caafimaadka ee ku dhow goobta, si loogu sameeyo daryeel iyo daaweyn.

Xogta ku saabsan khasaaraha ka dhashay weerarka ayaa waxaa Warbaahinta la wadaagay ilo kala duwan, waxaana sidoo kale xaqiijiyay xubno ka tirsan kooxaha u dooda xuquuqul insaanka, kuwaas oo sheegay in dadka la beegsaday ay u badnaayeen shaqaale ka shaqeynayay qodista macdanta.

Goobtan ayaa horey loogu soo sheegay weerarro kale oo ay ka dhaceen duqaymo, waxaana 23-kii June 2026 isla deegaankaas laga soo wariyay duqayn lagu dilay dad Suudaani ah oo ku howllanaa qodista macdanta. Masar ayaa markaas sidoo kale lagu eedeeyay inay ka dambeysay weerarkaasi.

Deegaanka la duqeeyay ayaa ah dhul buuraley ah oo muddo dheer ay ka socotay qodista macdanta, taas oo qayb ka mid ah loo dhoofiyo suuqyada dibadda. Aaggaasi waxaa loo yaqaannaa Jabal al-Uqaydat, waxaana la sheegay in ciidamada Masar ay dhowr jeer weerarro iyo duqaymo ka fuliyeen.

Eedeymaha loo jeedinayo Masar ayaa kusoo beegmaya xilli xiriirka u dhexeeya Qaahira iyo dhinacyada ku lugta leh xaaladda Suudaan uu yahay mid xasaasi ah. Si kastaba, eedeymaha ku saabsan duqayntan iyo cidda si rasmi ah uga dambeysay weli waxay u baahan yihiin xaqiijin dheeraad ah oo madax-bannaan.

Masar weli kama aysan bixin faahfaahin rasmi ah oo ku saabsan eedeymaha loo jeediyay ee la xiriira duqayntan.