Ombelewa yoSwapo mOhangwena ya yambididwa kovanangeshefa

EENHANA- Ovanangeshefa va dja moshitukulwa shaHangwena ova yambidida ombelewa yoSwapo oyo i li mEenhana noshimaliwa shi fike N$111 000 tashi ka longifwa okuninga oluumbo lodalate.

Omukwatakanifi woswapo mOhangwena, Josua Phillemon okwa yelifa ta ti natango ombelewa yavo oye shi pondola okukala ya ongela po oshimaliwa shi fike N$300 000. “Oshimaliwa eshi otashi ka longifwa okuninga oluumbo lombelewa shaashi paife odalate yoluumbo oya kulupa,” ta ti.

Phillemon okwa ti oshimaliwa shi fike N$365 000 osha pumbiwa okukala sha ninga oluumbo lodalate opo li kale la pwa okutunga.

Okwa ti itashi ulike efano liwa eshi ombelewa yakula yoswapo moshitukulwa ndele oina oluumbo lodalate la kulupa.

“Paife osha ninga shipu koolyamupombo vaye meni loluumbo nelalakano lokuvaka po omaliko omombelewa ile okuteya po oinima yetu,” ta ti.

Okwa weda po ta ti ngeenge okwa tulwa oluumbo lodalate nena otashi kwafele okukelela okaalyamupombo.

“Natango, otashi eta oimuna iye meni loluumbo shaashi odalate shaashi oli na eembululu,” a weda po.

Phillemon okwa pandula ovanangeshefa va yambidida ombelewa yavo molwaashi eshi otashi ulike oukumwe moshitukulwa.

Okwa ti ovanangeshefa ovanhu va fimana moshitukulwa molwaashi oha ve li unganeke ndele tava yambidia.

“Ombelewa yoswapo oyoshiwana osho sha pumbwa omayakulo ongudu yetu. Swapo ongudu ya fimana moshilonga shaashi otai twikile okupangela nokukaleka po ombili noukumwe osho yo okueta po exumokomesho,” ta ti.

Mexuliloshivike, Phillemon okwa yandja eedjapo dolupandu kovanhu ovo va yambidida ombelewa yavo.

Okwa kumaida oilyo yoswapo opo i twikile okukala noukumwe osho yo ombili nokulonga nondjungu okuxwaxwameka ovanhu va waimine Swapo.

–fhamalwa@nepc.com.na

The post Ombelewa yoSwapo mOhangwena ya yambididwa kovanangeshefa appeared first on New Era.