Umusore yagwiriwe n’ikirombe

Ndungutsimana Vincent w’imyaka 30 y’amavuko, yagiye gucukura amabuye y’agaciro mu buryo amategeko atemera, ikirombe kiramugwira.

Impanuka y’ikirombe yishe Ndungutsimana Vincent yabareye mu Mudugudu wa Burerabana, Akagari ka Ruhango, Umurenge wa Rongi, Akarere ka Muhanga.

Umunyamabanga Nshingwabikorwa w’Umurenge wa Rongi Ndayisenga Placide yabwiye UMUSEKE ko byabaye ku manywa y’ihangu yo kuri iki Cyumweru, abari kumwe na Ndungutsimana Vincent batabaza abaturage begereye icyo kirombe Leta yafunze, bafatanya gukuramo umurambo w’uyu musore.

Ati: “Yari kumwe na bagenzi be benshi, kandi ikirombe bacukuragamo amabuye y’agaciro kirafunze.”

Gitifu Ndayisenga avuga ko Kampani yahakoreraga yahagaritswe hakaba hashize igihe kinini, ariko abo bita abahebyi ni bo bakomeje kuhacukura mu buryo butemewe.

Gusa bamwe mu baturage bahaturiye, bavuga ko hari bamwe mu bayobozi ba za Kampani zafunzwe bazi, bakoresha amakosa abo bahebyi babashukisha amafaranga makeya bakura muri ubwo bucukuzi bw’amabuye y’agaciro butemewe kuko bayabashyira bakayagura byitwa ko bayavanye mu birombe bifite impushya.

Bakavuga ko bazi abo babashuka kujya mu bucukuzi bw’amabuye y’agaciro butemewe, bakifuza ko bafatirwa ibyemezo bikaze kugira ngo bacike kuri iyo ngeso.

Umurambo wa Nyakwigendera wajyanywe mu Bitaro bya Nyabikenke gukorerwa isuzuma, mu gihe iperereza rya RIB rikomeje.

MUHIZI ELISÉE
UMUSEKE.RW/Muhanga