Oshiwike shomuthigululwakalo onkene tashi tsikile okutyapulwa

Victoria Immanuel

Aanasikola okuza koosikola dha yooloka onkene taya hsikile okutyapula oshiwike shomuthigululwakalo shoka hashi dhimulukwa omumvo kehe oshiwike oshititatu, momwedhi gwaSeptemba.

Aanasikola, aaniilonga osho wo oshigwana osha zala sha opala, sha zala omizalo dhopamuthigululwakalo dha wo.

Kehe gumwe okwa zala omizalo dhomihoko dhelaka lye.

Aalongwa ayehe otaya ka zala omizalo dhomithigululwakalo Etitano ndika, omanga aalongi poosikola dhimwe ya kutha esiku moshiwike shika, ya zala omizalo dhopamuthigululwakalo okusimaneka oshiwike shika.

Omulongwa gumwe Evi-Lydia Ningeni okwa ti, oya li ya simaneke oshiwike shomuthigululwakalo momikalo dha yooloka.

“Okuza Omandaaha sigo nena otwa li twa zala omizalo pamwe naalongi yetu. Etine ota tu ka tyapula iikulya yopamuthigululwakalo, omanga nena twa dhana iidhano yopamuthigululwakalo,” ta ti ngaaka.

Ta ti, aalongi yawo oye ya longo esimano lyomuthigululwakalo.

“Onda ilonga oshindji moshiwike muka. Atushe Aanamibia, tu na omihoko dhi na omithigululwakalo dha yooloka,” ta hokolola.

Ta popi ta ti okwa tseya iikulya yopamuthigululwakalo yomihoko ngaashi Aakaprivi ya simaneka ohi yoZambezi Bream, Aakavango mboka ya simaneka omutete osho wo Aaherero mboka ya simaneka Omaere osho wo onyama.

Ta ti, “onda tseya wo natango shoka sha pitikwa nenge sha indikwa momihoko dha yooloka, ano mbyoka ya ta li ka ko onga iipwe nenge iidhila,” ta popi ngaaka.

Ningeni okwa lombwele Kundana ta ti, oshiwike shika otaye shi tyapula nawa lela, nokwa ilonga mo oshindji.

Victor Mutota ngoka ha hiti osikola kOshakati Primary okwa ti, oya li ya fatululilwa kutya omuthigululwakalo ogwa simana nogu na okusimanekwa sigo aluhe.

“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola.

Ta ti, oya li ya fatululilwa kutya omuthigululwakalo ogo omaukwatya gomihoko dhontumba, gwi ikwatelela kelaka, eitaalo, omaihumbato, iikulya, omizalo, iiyimbo nosho tuu.

Mutota ta ti, okwa ilongo mo wo kutya aantu oye na okusimanekathana osho wo okutaamba uukwatya wooyakwawo.

“Oyendji oya kanitha eitaalo lyomuthigululwaka omolwa ya lamba shoka taya longwa kaakwiilongo nenge taya landula omikalo dhawo,” ta popi ngaaka.

Namibia omuyamba pamuthigululwakalo, ngoka gu na okusimanekwa nokulandulwa komihoko adhiye.

The post Oshiwike shomuthigululwakalo onkene tashi tsikile okutyapulwa appeared first on New Era.