Mwoonde ta denge ongeshefa keengaba da Angola na Namibia

Olivia Mwoonde, omukalimo womOshikango moshitukulwa shaHangwena okwa ti paife okwa ninga eedula da fika po 10, ta denge ongeshefa yaye yokulandifa oilandifomwa yaye keengaba da Shikango na Angola.

Okwa ti manga vamwe tava idile omivelo deenghesfa davo komatango va dimbuke, ye ota kwatele kumwe oubesa noutukutuku vouhallelujah a finda moAngola taka teka ostoka yaye.

Okwa ti etango eshi ta li ka eta eenhemo efiku la landula, naye ota tauluka eengaba atya eendongelwa daye komutwe opamwe nomahewa aye oo Shimwenyo noo Kwalidade veuye va denge ongeshefa.

Mwoonde okwa ti tete okwa li ashike ha landifa oikutu koshi yomuti meumbo nokonima okwa ka tembukila kodoolopa yaShikango oko ongeshefa yaye yaa tameka okuya komesho.

“Ongeshefa mOshikango nomoAngola otai ende ashike nawa shaashi ngeenge ondi na nande osheshi nda pumbwa moAngola ndele kashi mo alushe ohandi kala ndishii kutya mOshikango omo handi shi hange,” ta yelifa.

Okwa twikila kutya ongeshefa yaye ohai longo efiku alishe hano eetundi o 24 notai yambidida ovanhu vomapupi aeshe, kutya nee ounona ile ovakulunhu.

“Okulandifila popepi neengaba osha pashula omesho ange nghee ndina okuninga ongeshefa unene ava hatu landifa oinima ya yooloka,” Mwoonde ta ti.

Okwa twikila ta ti ngeenge okuwete nande oku li kutya oshinima shonumba osho ta landifa ita shi landwa, oha kendabala alushe aka tale nghee ovanangeshefa vakwao tave shi landifa ye ta teke ko ounongo,” ta ti.

Nonande ongeshefa yaye hai kala tai ende nawa peemhito dihapu, Mwoonde okwa ti oha kala noku taalela omashongo ookalyamupombo, onghalo yomhepo oyo hai mu imbi a wanife po aishe oyo kwali a hala okulandifa efiku lonhumba, eecustoma tadi ningiluka nokumushunifila oinima nande a hangika ei landa nale osho yo okukufwa oinima yaye peengaba ngeenge ta piti.

Mwoonde okwa twa ovanyasha omukumo kutya ka pe na ongheshefa hai dulu okukufa ko omunhu meendelelo i dulife ongeshefa yopoushiindalongo poAngola.

“Omhunu kutya ou na nande o N$ 200 ndele to ningine po pevale opo ouna ashike okudja po nasha osho to dulu okulanda ove to uya nee utungile ko,” ta ti.

Okwa twa yo oombushe vaye moilonga ava hava ningi eengeshefa davo nale, vaha sholole ndele nava pule ashike komesho oveli ashike nawa.

*[email protected] *

The post Mwoonde ta denge ongeshefa keengaba da Angola na Namibia appeared first on New Era.