Puntland oo sheegtay in ay Maraykanka iska kaashadeen duqayn ka dhacday Calmadow.

Maamulka Puntland iyo Dowladda Mareykanka ayaa xaqiijiyey in si guul leh loo fuliyey howlgal ka dhan ah Al-Shabaab oo ka dhacay deegaanka Markad ee buuraleyda Al-Madow-Golis.

Labada dhinac ayaa sheegay in howlgalka lagu bartilmaameedsaday goob Al-Shabaab ay u adeegsan jirtay keydinta hubka iyo rasaasta, kuwaas oo sida ay sheegeen loogu talagalay taageeridda howlgallada kooxda iyo weerarrada ka dhanka ah shacabka Puntland iyo Soomaaliya.

Puntland ayaa sheegtay in howlgalka, oo lala kaashaday ciidamada Mareykanka, uu qayb ka yahay dadaallo lagu wiiqayo awoodda Al-Shabaab iyo xarumaha ay u adeegsato qorsheynta iyo fulinta weerarrada.

Maamulka ayaa sidoo kale sheegay in howlgalka uu qeyb ka yahay olole ballaaran oo lagu doonayo in Al-Shabaab looga saaro deegaannada waqooyi ee Soomaaliya, isla markaana looga hortago in kooxda ay hesho goobo ay gabaad iyo keyd hub uga dhigato.

Puntland iyo Mareykanka ayaa sheegay inay sii wadi doonaan iskaashiga ka dhanka ah Al-Shabaab, iyagoo ku tilmaamay howlgalka tallaabo lagu yareynayo awoodda kooxda iyo khatarta amni ee ka jirta waqooyiga Soomaaliya.