Oosikola dha konda pe100 moshitopolwa shaKavango Uuzilo odha taalelwa kompumbwe yoongulusikola, oolabora osho wo iikwathitho yokugandja omeya, naashoka osha yelithwa molopota yehumokomeho yoshitopolwa shaKavango Uuzilo.
Oshitopolwa shoka onkene sha taalelwa kompumbwe nonande okwa li sha pewa oshimaliwa shoomiliyona N$8 okuza kepangelo sha nuninwa okutunga oongulusikola poosikola ngaashi yEdward Mukoya Secondary School, Kambimba Combined School, Augustinus Mashika Secondary School, Pikinini Junior Primary osho wo Muhopi Primary School.
Pethimbo ta gandja uuyelele mboka mopaliamente, oshiwike shika, kansela gwoshikandjohogololo shaMukwe, Augusta Katembo okwa popi kutya oshitopolwa shaKavango Uuzilo okwa li sha pewa oshimaliwa shoomiliyona N$19,3 shokwoopalekulula oongulusikola, okutunga uundjugo osho wo okutula olusheno poosikola heyali.
Oosikola ndhoka odho nee Hompa Sophia Mundjembwe Junior Primary School, Neyuva Combined School, Muroro Primary School, Mabushe Combined School, Neyuva Secondary School, Mungunda Primary Schools osho wo Tjeye Primary School.
Nonande epangelo lya ningi oonkambadhala ndhoka, Katembo okwa popi kutya oshitopolwa shaKavango Uuzilo onkene sha taalelwa kompumbwe yoombelewa dhoosikola 62 osho wo oolabora heyali dhookompiyuta nuudhindoli, omanga oosikola heyali odhi li mompumbwe yomeya.
“Oongulusikola dhi li po140 osho wo omatungo galwe gelongo oge li monkalo tayi etitha ohenda.
Elongo onkene olyo lya talika ko ongoshinima sha simana momapendulopo,”osho a popi ngaaka.
The post Oosikola moKavango dha taalelwa kompumbwe yoongulumambo appeared first on The Namibian.
